1Th 5 | ASO | STEP | Neze zuho mate, gamene nanike' ogo vavosa Guvetesi ve alive ido' nanite' nanite' soto' ogavosa alive. Ne'mine initekumu' nene nanitekumu' luhuvo nite' gize lengemelone.

1 Thessalonians 5

Guvetesi ve Alingumu' Gizebo Ogo Minelone' Gamazi

1 Neze zuho mate, gamene nanike' ogo vavosa Guvetesi ve alive ido' nanite' nanite' soto' ogavosa alive. Ne'mine initekumu' nene nanitekumu' luhuvo nite' gize lengemelone. 2 Langisetine gili nizave. Guminelo' ve holuka' alizave lo gelamune' gamenelo' igi hetelaa' adi'mino Guvetesi vesi a'mine'mine ogo aloseive lo gelamolone' gamenelo' ogo heteleleseive. 3 A'mine gamenelo' evene' ingine gamene lamine' initeli'mo lebelamiline' gamene neive li nizavo ngemengingi initeli'mo lite' lo ogo mudise do goloso o-ngedeleseive. Izipe gatu'inesi vene' ingine mulumo gililiza gamene gilami gopo nimonavo mulumo inginela soto' ogavo nini' iga' nani' ne'mine ogo a'mine ngemengingi inite' nene soto' o-ngemeleseive. Soto' o-ngemavo nene ngeli golise vilizahe.

4 Neze zuho mate, lingine nene initekumu' ma gilami liti'musou' ma minamave. Nemu' nene guminelo' vemu' evene' ingine gizebo igi minamilizani' gamenelo' igi hetelaa' ani' ne'mino linginesi a'mine gamenemu' gizebo igi minamado' ogo do upuho' o-lengedalive. 5 Lingine muki' labanali'mi zuho nizave. Liti'muso'mi zuho nomune. 6 Nemu' evene' lingela haza ve ingine lu'ine okise ongo minaa' ine' ne'mino lute ongamivo lute gate gopo amivo la'lisete gizebo ele'vole' ogo minukele'zo. 7 Ingine okise ingaa' nave nene liti'musou' ingaa' nave. Ido' noso nii sipaki iga' nave inginesi nene liti'musou' nii sipaki iga' nave. 8 Labana' gamene'mi evenele nounako sipaki amo lute gate do veveso minelone. Ne'mine ogo Izesu'nimu' gele ele'vole' o none' ido' lute ngemaa' noune' ne'mo lepesete lolo' ogavo O'moso'mo do lu' izavo lamine' minelone lo lute gilingili ogo minaa' neine' ne'mo leze lovo angili' ne'mine lolo' ogavo minelone. 9 Ne'mi monovo ne'mino neive: O'moso'mo izebolo' molani' nene apase-ledo lihime lemelove lo lele'mize molani' nomive. Asi Guvetesi ve Izesu' Kilisito' do lu' izavo minelone lo lele'mize molani' ma neive. 10 Hele noosa nehe vetesi minosa nehe ogavo ezesi minevo' minevo' ogo minelone lo Guvetesi ve lelikumu' ogo hiline'. 11 Nemu' nene lutinedunu' ge hize ele' o-nede ne hize ele' o-gede li lutine di amuzo mili mini monoku' ge do amuzo molo-nede ne do amuzo molo-gede li idise iga' nani' ne'mine i diivo' vi minilizave.

Ga'ine Do Geke' Lo-ngidine' Gamazi

12 Neze zuho mate, inite' mamu' amuzo molo nolo-lingidune: Guvetesi ve'mo ngele'mize molavo lengita mono' gono di gizebo i-lingidi mini lengele'mizi hehe li nizavemu' nene gili lamine' igi minilo. 13 Mono' gono daa' nanako engikumu' gilikevo amuzo molo dizavo mini lutine ngimi nasahili' i-ngidi minilo. Ido' lengi' okodingu' lovo lolize hizami hongu li minilo. 14 Ido' neze zuho mate, gatine do ti' lo nolo-lingidune: Izesu' evenele malite oko'ine losuvo'mi gono dami gopo minaa' nani' nene di hehe li-ngidilo. Ido' golise gelekele' igi nizave nene di amuzo mili-ngidilo. Ido' Izesu' evenele maliti lu'ine nene ele'vole' amivo ma nene hize ele' i-ngidilo. Ne'mine igi evene' mukikumu' elese' igi hongu li minilo. 15 Evene' mali'mo lengi' muludine do goloso o-lengedavo ma lingine gohi eze o-lididi'mine ve li eze muluno di goloso i-damilo. Ne'mine ikelizaze. Lutine gizebo lamine' igi gamene gamene linginesi evene' mukikisi do lamine' o-ngedelone li a'mine monovolokovo' eleti igi mili minilo.

16 Muludingu' gulumo avile lisivovo' minilo. 17 Gosele' lengebelamivo O'moso opo'ni livo' minilo. 18 Ne'mine mana'mine initekumu' O'moso opo'ni livo' minilo. Izesu' Kilisito' evenele zuho nizangumu' nene O'moso'mo ne'mine igi minilizave lo gele neive. 19 O'moso'mi Sikalahu' nene izi huki-damilo. 20 Ne'mine ami O'moso'mi veleti' gamazi li-lingimilizani' nene gilikevo haza nite' amivo. 21 Gamazi muki' nene lamine' nehe goloso nehe lii ize' mili gili minilo. Lamine' neivo ma gili di minilizave. 22 Ido' goloso nite' ato' atoli'mine muki' nene hulilizave.

23 O'moso aza hongu meleho asi've lutine do lamine' gehepeve o-lengedo gizebo o-lengedavo vodinesi lengemenisi okodinesi lisihe' ogo lamine' minavo Guvetesi ve Izesu' Kilisito' aline' gameneu' nene lihimetine nomine' minilizaho. 24 Elese molo lingimive ne'mo lo huko line' gamazi've'mi gihile do soto' molalingumu' nene idise a'mene luvoni' gamazi ne'mi gihile nene do soto' molaloseive.

25 Neze zuho mate, lelikumu' ve li O'mosola li minilo. 26 Izesu' evenele muki' nene monoku' a'mine o neine' monovolo' e'meti a'nido' di ngabuti' izaa' monovo ne igi mili minilo.

27 Naza Guvetesi ve'mi velemu' ogo amuzo molo ti' lo nolo-lingiduve: Izesu' evenele zuho muki' gili osu' lilizangisi luhuvo nite' mene gati ngimilo. 28 Guvetesi ve Izesu' Kilisito' ei' nasahili've linginela minelive lo O'mosola noluve. Moda ve.